რა მოხდა?
ერთი ჩვეულებრივი სამუშაო დღე იყო. მე-2 მექანიკოსმა, როგორც წესი 16:50-ზე შეკრიბა მექანიკოსები, ჩაიბარა შესრულებული სამუშაოები და გაუშვა ყველა დასასვენებლად.
ერთმა მოტორისტმა, იმის ნაცვლად, რომ სხვებს გაჰყოლოდა და დაესვენა, ყველასგან უკითხავად გადაწყვიტა ქიმიური ნივთიერებების საწყობ ოთახში შესულიყო, რათა რომელიღაც საწმენდი ქიმია აეღო. ქიმიის ოთახამდე ერთი პატარა გამყოფი ოთახი იყო სახელად Air Lock Room. სწორედ ამ ოთახში შევიდა ის და მოკეტა თვითჩამკეტი მექანიზმით აღჭურვილი კარი, რომელსაც სახელური მოტყდა და ხელში შერჩა. ქიმიური ნივთიერებების საწყობი ოთახიც ჩაკეტილი დახვდა და კარიც ვერ გააღო, რომ უკან გამოსულიყო.
მეზღვაურმა დაიწყო ყვირილი, მაგრამ სამანქანე განყოფილებაში აღარავინ იყო და სავარაუდოთ რომც ყოფილიყო, ვერც კი გაიგონებდნენ სამანქანე განყოფილების ხმაურში.
სამწუხაროდ სამანქანე განყოფილების ღამის შემოწმებაზე სავახტო მექანიკოსმა ვერ შეამჩნია კარებთან დაგდებული მოტეხილი სახელური.
ეკიპაჟის სხვა წევრებმაც ვერ შეამჩნიეს რომ მოტორისტი არ იყო ვახშამზე (18:00) და როცა დილითაც არ გამოცხადდა საუზმეზე, მხოლოდ ამის შემდეგ გამოცხადდა განგაში და დაიწყო სამძებრო ოპერაცია.
საბედნიეროდ იპოვეს გატეხილი სახელური, ჩამოხსნეს კარი და გამოიყვანეს სიცხისგან და წყურვილისგან გონებადაკარგული მატორისტი, რომელიც მთლიანობაში 15 საათის განმავლობაში იმყოფებოდა მარტო ასეთ სტრესულ და სიცოცხლისთვის სახიფათო გარემოში.
რატომ მოხდა?
- მოტორისტმა უგულვებელყო ზემდგომის დავალება/მითითება;
- სავახტო მექანიკოსმა არასათანადოთ შეასრულა თავისი მოვალეობა ღამის შემოწმების დროს;
- ეკიპაჟის წევრებმა არ მიაქციეს ყურადღება კოლეგის არ ყოფნას ვახშამზე.
რას გვასწავლის ეს შემთხვევა?
- აუცილებელია სუბორდინაციის დაცვა და ზემდგომის დავალებების ზედმიწევნით შესრულება;
- აუცილებელია ყველამ ზედმიწევნით შეასრულოს თავისი მოვალეობები და ვალდებულებები;
- აუცილებელია ეკიპაჟის ყველა წევრი ზრუნავდეს თავის კოლეგაზე.
ასევე იხილეთ: უფროსი მექანიკოსის რჩევები დამწყებ მეზღვაურებს
