ინტერვიუ შორეული ნაოსნობის კაპიტნის უფროს თანაშემწესთან ბატონ ირაკლი შაქარიშვილთან.
რამ განაპირობა თქვენი მეზღვაურობა?
ადამიანისთვის მთავარია შრომისმოყვარეობა და არჩეული პროფესიისადმი სიყვარული. თუ ეს ორი კომპონენტი შერწყმულია, იგი არამარტო წარმატების საწინდარი, არამედ ბედნიერების სათავეცაა. გულახდილად რომ გითხრათ, მეზღვაურობა არასდროს მიტაცებდა, ყოველთვის მინდოდა ვყოფილიყავი იურისტი, პროფესიის არჩევაში ოჯახი დამეხმარა, რისთვისაც ვმადლობ მათ, თუმცა ვაღიარებ და დავსძენ, რომ დღეს რომ მქონდეს არჩევანის უფლება აუცილებლად ისევ მეზღვაურობას ავირჩევდი.
თანამდებობა, რომელზეც ეხლა ვიმყოფები, დიდი ძალისხმევის, მონდომების, დროის, რაღაც დოზით რისკისა და რათქმაუნდა მოტივაციის შედეგია.
რატომ გადაწყვიტეთ პეადოგოგობაც?
როდესაც სტუდენტი გავხდი, განსაკუთრებული პატივისცემით ვიყავი განწყობილი ჩემი ლექტორების მიმართ, ყოველთვის სასიამოვნო იყო მოწვეული ლექტორის ლექცია, რომელიც დასმულ შეკითხვას ამომწურავად პასუხობდა, მაშინ ვუთხარი საკუთარ თავს, რომ მოვა დრო, მეც შევაღებ აუდიტორიის კარს და მეც წავიკითხავ ლექციას… ვოცნებობდი ხმელეთზე ყოფნის დროს რომ წამეკითხა ლექცია და ჩემი ცოდნა გამეზიარებია სტუდენტებისთვის. ვარ მიწვეული ლექტორი ბათუმის სახელმწიფო საზღვაო აკადემიაში, კოლეჯ მერიდიანში და ასევე მეზღვაურთა სერთიფიცირების ცენტ მერიდიანში ვარ ინსტრუქტორ შემფასებელი.
ლექტორობა ჩემთვის ეს არა მხოლოდ პროფესიული ცოდნაა, არამედ ის უდიდესი ცოდნა და უნარია, რომლის სტუდენტებისთვის გადაცემა, მათ რეალიზებულ პიროვნებებად ჩამოაყალიბებს.
რას გაძლევთ სტუდენტებთან ურთიერთობა?
ჩემთვის სტუდენტებთან კომუნიკაცია სრული ჰარმონიაა, ჩემი სახმელეთო სამსახურის ყველაზე სასიამოვნო განცდაა და მთელ ძალას, ენერგიას დღის დასაწყისსა და დასასრულს მათ ვახმარ. ყოველთვის კმაყოფილი ვარ როცა ყველაფერი კარგადაა, სრულფასოვანი, შედეგიანი, ნაყოფიერი სასწავლო პროცესი და ჩემს მიერ პირნათლად შესრულებული საქმე. მიუხედავად ჩემი სიმკაცრისა, მაინც დავიმსახურე სტუდენტების გულწრფელი სიყვარული, ვარ ბედნიერი და ამაყი, როდესაც შაბათ-კვირასაც დამატებითი ლექციების დროს გადაჭედილი აუდიტორია და სრული ანშლაგია.
პროფესიულ სტუდენტებთან თუ გიმუშავიათ?
წელს პირველად ვკითხულობ კოლეჯ მერიდიანში ლექციას, ვარ ძალიან კმაყოფილი სტუდენტების, მათთან დრო საოცრად გადის, არის ისეთი დღეები, როდესაც დასვენების დროსაც არ გადიან სტუდენტები აუდიტორიიდან და მთელი საათები ვსაუბრობთ ამომწურავად, ვარ ძალიან კმაყოფილი, ვინაიდან რამოდენიმე სტუდენტი დამთანხმდა, რომ მათ სწავლას კოლეჯის დასრულების შემდეგ უმაღლეს საზღვაო სასწავლებელში გააგრძელებენ და მიაღწევენ არჩეული პროფესიის მწვერვალს. კოლეჯში საოცრად სასიამოვნო გარემოა შექმნილი, პროფესიულ ცოდნასთან ერთად, ადამიანურ ფასეულობებს, მეგობრობას სწავლობენ. თეორიულ ცოდნასთან ერთად კოლეჯი პრაქტიკულ გამოცდილებასაც აძლევს და ყველა ლექტორი ამომწურავად და ფუნდამენტალურად უხსნის თავიანთ საგანს. რაოდენ საკვირველიც არ უნდა იყვეს, ისეთი გარემოა შექმნილი კოლეჯში რომ, საგაკვეთილო დროის ამოწურვის შემდეგ სტუდენტები რჩებიან დამატებით და მუშაობენ.
რას ფიქრობთ განათლებაზე?
კარგიდან საუკეთესოსკენ შესასცვლელად ყველაზე კარგი გზა განათლების გავრცელებაა, რაც სწორედ მასწავლებლის ამოცანაა. რა უნდა იყოს უფრო შთამაგონებელი, ვიდრე ის, რომ გაქვს ცოდნა, რომელიც შეგიძლია გაავრცელო და ხედავდე როგორ ხდებიან შენი სტუდენტები წარმატებულები. ჩემი წყალობით თუ ერთზე მეტი განათლებული ადამიანი მაინც დადის საზღვაო სფეროში, მაშინ ნამდვილად მაქვს მიზეზი ვიამაყო.
მუდმივად ვცდილობ, რომ გადავფარო ცოდნის საზღვრები და თვითგანვითარებაზე ვიმუშაო, რადგან ჩემს პროფესიას ცხოვრების ბოლომდე რაღაცის სწავლა უწევს.
რას ფიქრობთ სტუდენტთა მოტივაციაზე?
სტუდენტისთვის სწავლის მოტივაციის გაუმჯობესების მიზნით, ლექტორებს მრავალფეროვანი სტრატეგიების გამოყენება გვჭირდება. პროფესორები ხშირად ამბობენ, რომ ეფექტური სტრატეგიებით შესაძლებელია სტუდენტს არა მხოლოდ კარგი აკადემიური მოსწრება ჰქონდეს, არამედ ყველაზე პასიური სტუდენტიც კი დიდი მონდომებით ჩაერთოს სასწავლო ცხოვრებაში.
სტუდენტების დაბალი მოტივაციის მიზეზი ასევე, შეიძლება იყოს წარუმატებლობის შიში, დაბალი თვითშეფასება, თვითგამოხატვასთან და ცოდნის გამოვლენასთან დაკავშირებული პრობლემები, გადაღლა ხანგრძლივი და ინტენსიური სწავლის ფონზე, ენობრივი ბარიერი, ასევე ის ფაქტიც, რომ სტუდენტი სწავლასთან ერთად მუშაობს. რასაკვირველია, მნიშვნელოვანი გამოწვევაა სოციალური პრობლემებიც. სასწავლო პროცესის თანმდევმა სირთულეებმა, შეიძლება დააქვეითოს სტუდენტის მოტივაცია და სწავლისადმი ზედაპირული დამოკიდებულების ჩამოყალიბება განაპირობოს. ამიტომ, აუცილებელია ვიცოდეთ, რა უშლის ხელს სტუდენტს, რომ მოტივირებული იყოს.
რას ურჩევდით თქვენს კოლეგა ლექტორ-მასწავლებლებს?
მე ჩემს კოლეგა ლექტორებს ვურჩევდი – თუ სურთ, რომ სტუდენტი მოტივირებული იყოს:
- არ გაამახვილონ ყურადღება ნიშნებსა და შეფასებაზე, რამეთუ, ქულებზე აქცენტირებისას სტუდენტებმა შეიძლება ეგოცენტრულობა გამოავლინონ და ნაკლებად ჩაერთონ დასახული მიზნისა და ამოცანის შესრულებაში;
- უპირატესობა მიანიჭეთ სტუდენტების თვითშედარებას და არა სხვებთან შედარებას; დაანახეთ სტუდენტებს საკუთარი პროგრესი და განვითარება, განუმარტეთ დაშვებული შეცდომები და მათი არსი;
- დაიმახსოვრეთ, რომ ლექტორის მიდგომას თითოეული სტუდენტის ინდივიდუალური მახასიათებლები განსაზღვრავს. სტუდენტების მოტივატორების შერჩევისას აუცილებლად უნდა იქნას გათვალისწინებული მათი საჭიროებები და მოთხოვნები, რაც ნათლად იკვეთება უშუალოდ სწავლების პროცესში;
მინდა ვუსურვო ყველა სტუდენტს საუკეთესო მომავალი და ყველა ლექტორს, საქმისადმი სიყვარული.
