ახალგაზრდა, რომელიც ღებულობს გადაწყვეტილებას მიუძღვნას თავისი ცხოვრება ზღვას და მეზღვაურის პროფესიას, უპირველეს ყოვლისა ფსიქოლოგიურად უნდა იყოს მომზადებული ამისათვის. რა თქმა უნდა, რთულია ყველაფრის წინასწარ გათვალისწინება, მაგრამ აუცილებელია იცოდეს თუ რას ნიშნავს „მეზღვაურობა“, რა პროფესიაა და როგორ უნდა შეცვალოს თავად თავისი ცხოვრების „კურსი“.
გარკვეულწილად ამის შესახებ ისინი ღებულობენ ცოდნას და ინფორმაციას საზღვაო საგანმანათლებლო დაწესებულებებში, თეორიული და პრაქტიკული მეცადინეობების დროს, მაგრამ ეს არ არის საკმარისი. დამწყებ მეზღვაურებს ესაჭიროებათ მეტი შეხვედრები გამოცდილ მეზღვაურებთან, პროფესიონალებთან, რათა გაიზიარონ მათი გამოცდილება.
ყველაზე მეტად დღევანდელ დღეს დამწყებ მეზღვაურებში პრობლემატურ საკითხად დგას „სწრაფი კარიერული წინსვლის მოთხოვნა“, რაც გარკვეულწილად უარყოფითად მოქმედებს მათ პროფესიონალიზმზე, პრაქტიკულ უნარებზე და რაც მთავარია „შედეგზე“.
როგორც ვიცით, პიროვნებას, რომელმაც მიიღო უმაღლესი საზღვაო განათლება, ესაჭიროება მინიმუმ 12 თვიანი ე.წ. „საცურაო/საზღვაო პრაქტიკა“, იმისათვის რომ აიღოს კომპეტენციის სერტიფიკატი, რაც არის იმის დასტური რომ მეზღვაურის კვალიფიკაცია შეესაბამება საერთაშორისო მოთხოვნებს და ის უფლებამოსილია გემზე დაკავდეს სავახტე ოფიცრის თანამდებობაზე. ამის შემდეგ ყველა მეზღვაური ცდილობს „რაც შეიძლება მალე, სწრაფად“ მიაღწიოს თავისი კარიერის მაქსიმუმს, გახდეს კაპიტანი ან უფროსი მექანიკოსი, რასაც როგორც შესაბამისი პრაქტიკული გამოცდილების მიღება, ასევე სხვადასხვა მიმართულებით უნარ-ჩვევების განვითარება ესაჭიროება, როგორიცაა – ლიდერობის უნარი, გუნდური და ჯგუფური მუშაობის უნარი, გადაწყვეტილების მიღების უნარი, თვითდაჯერებულობის უნარი და ა.შ.
ხშირ შემთხვევაში მეზღვაური, მხოლოდ კარიერულ წინსვლაზე არის ორიენტირებული და არ ფიქრობს, არ აქცევს ყურადღებას თავისი უნარების განვითარებას, თვითმომზადებას იმისათვის რომ იყოს კარგი „ლიდერი“.
ყველა ჩვენთაგანს შეგვხვედრია კაპიტანი/უფროსი მექანიკოსი, რომელსაც მიღებული აქვს კარგი საზღვაო განათლება, კარგად ფლობს ინგლისურ ენას, მაგრამ არ არის „ლიდერი“, ვერ მართავს ეკიპაჟის წევრებს და ვერ ღებულობს ეფექტურ გადაწყვეტილებებს რთულ სიტუაციებში. ეს ძალზედ უარყოფითად მოქმედებს გემისა და ეკიპაჟის უსაფრთხო მართვაზე, რაც მისი, როგორც კაპიტნის / უფროსი მექანიკოსის პირდაპირი პასუხისმგებლობაა.
ჩემი, როგორც შორეული ნაოსნობის კაპიტნის, ბათუმის სახელმწიფო საზღვაო აკადემიის პროფესორის მრავალწლიანი გამოცდილებით მსურს მოგცეთ რჩევა, რაც უაღრესად მნიშვნელოვანია თქვენი კარიერულ წინსვლაში გათვალისწინებისათვის და კარგი მენეჯერის, ლიდერის ჩამოყალიბებისათვის.
მაგალითისათვის ავიღოთ გემთწამყვანი მიმართულების დამწყები მეზღვაური:
- კომპეტენციის სერტიფიკატის აღების შემდეგ თქვენ გემზე დასაქმდებით კაპიტნის მე-3 თანაშემწედ. პირველი კონტრაქტის პერიოდში თქვენ მაქსიმალური ყურადღება უნდა მიაქციოთ თქვენი, როგორც მე-3 თანაშემწის ვალდებულებებსა და პასუხისმგებლობებს და არავითარ შემთხვევაში არ უნდა იფიქროთ იმაზე რომ მომავალში თქვენ გახდებით მე-2 თანაშემწე და დროა მისი ვალდებულებების შესწავლა დაიწყოთ. პირველი კონტრატქი უნდა მიუძღვნათ თქვენი დაკავებული თანამდებობის, როგორც მე-3 თანაშემწის მოვალეობების განმტკიცებას;
- მეორე კონტრატის დროს, მე-3 თანაშემწის თანამდებობაზე, თქვენ ბევრად კომპეტენტური ხართ და შეგიძლიათ თქვენი დროის 20% მოახმაროთ მე-2 თანაშემწის უფლება-მოვალეობების შესწავლას და გაცნობიერებას;
- მესამე კონტრაქტის დროს, მე-3 თანაშემწის თანამდებობაზე, თქვენ დროის 50% უნდა დაუთმოთ მე-2 თანაშემწის უფლება-მოვალეობების შესწავლას;
- მეოთხე კონტრაქტზე თქვენ, (თუ ამას კომპანია გადაწყვიტავს) უნდა იყოთ მზად გემზე დაიკავოთ მე-2 თანაშემწის თანამდებობა ან წახვიდეთ მე-3 თანაშემწეთ გემზე გადასვლის/თანამდებობის შეცვლის პირობით, მე-2 თანაშემწედ.
ეს არის თქვენთვის, თქვენი პოროფესიული განვითარების და პრაქტიკული უნარების შეძენის კლასიკური ფორმა. აი ამ მიმართულებით, საფეხურებით უნდა გახდეთ უფროსი თანაშემწე და შემდეგ კაპიტანი. თქვენ მაქსიმალურად უნდა იმუშაოთ საკუთარ თავზე, კარგად უნდა გამოიმუშაოთ ლიდერობისა და გადაწყვეტილების მიღების უნარები, გუნდური მუშაობის პრინციპები და ა.შ. რაც არ უნდა პროფესიონალი იყოთ, თუ თქვენ არ გექნებათ ეს უნარები გამომუშავებული, ვერ იქნებით კარგი „ლიდერი“, რომელიც უფროსი თანაშემწისა და კაპიტნისათვის, როგორც მენეჯერებისათვის აუცილებელია.
ამ კლასიკური პრინციპით/საფეხურებით თქვენ დაგჭირდებათ 10 წელი თქვენი კარიერული პიკისათვის:
- მე-3 თანაშემწედ – 3 (+1 ) კონტრქტი / 2-3 წელი;
- მე-2 თანაშემწედ – 4 (+1) კონტრატქი / 3-4 წელი;
- უფროს თანაშემწედ – 5 (+1) კონტრაქტი / 4-5 წელი და
- ამის შემდეგ რა თქმა უნდა კაპიტანი.
მთავარია მონდომება, მუდმივი პრაქტიკული უნარების შეძენა, გამოცდილების გაზიარება და ფსიქოლოგიური მომზადება. თქვენ უნდა მიიღოთ გადაწყვეტილება შემდეგზე – „ხართ მზად იმისათვის რომ მართოთ ეკიპაჟი, იყოთ ლიდერი, მიიღოთ გადაწყვეტილება რთულ სიტუაციებში?“ თუ ამისათვის მზად არ ხართ, არ იჩქაროთ, გაზარდეთ თქვენი კარიერული წინსვლისათვის კონტრაქტების რაოდენობა, და იყავით დარწმუნებულნი თქვენს მზაობაში, ნუ დააყენებთ რისკის წინაშე ეკიპაჟს, გემს, ტვირთსა და გარემოს!
ასევე იხილეთ: პროფესია მეზღვაური
