მსურს ორიოდე სიტყვით გიამბოთ ქიმიურ ტანკერებზე მუშაობის სპეციფიკასთან დაკავშირებით,
ქიმმზიდ ტანკერებზე მუშაობა, სხვა ნებისმიერი ტიპის ტანკერებისაგან განსხვავებით, მაღალ რისკებთანაა დაკავშირებული, მათგან ცალკე გამოვყოფდი ქიმიურ ნივთიერებებთან მუშაობის სპეციფიკას, სადაც ტვირთის თვისებების ცოდნა სასიცოცხლოდ მნიშვნელოვანია. ყოველი ქიმიური ტვირთის გადაზიდვა დაკავშირებულია მაღალ რისკ ფაქტორებთან, რომელთა გათვალისწინება სასიცოცხლოდ აუცილებელია არა მხოლოდ ოფიცერთათვის, არამედ ეკიპაჟის ყველა წევრისათვის. 
კონკრეტულ ქიმიურ ტვირთთან მუშაობა იწყება ბევრად უფრო ადრე, ვიდრე მის დატვირთვას დავიწყებდეთ, ერთ-ერთი პირველი რასაც ეკიპაჟი უნდა გაეცნოს, არის ნივთიერებასთან უსაფრთხოების ნორმების მონაცემთა ამონაწერი [MSDS]. მას უნდა გაეცნოს ეკიპაჟის ყველა წევრი, გამონაკლისის გარეშე, რათა საფრთხის დროულად გამოვლენა შეძლოს და საჭიროების შემთხვევაში განგაშის სიგნალიზირება მოახდინოს. საფრთხის დროულად იდენტიფიცირება და შემდეგ სწორად რეაგირება განგაშზე არის წარმატების ელემენტარული ფორმულა.
ნებისმიერი ოპერაციის დაწყებამდე, ინფორმაცია რომელიც მოცემულია MSDS-ში დეტალურად უნდა იქნას განხილული ეკიპაჟის წევრებთან, იმისათვის რათა დავრწმუნდეთ, რომ ყველა მათგანი გაეცნო უსაფრთხოების წესებს. საჭიროების შემთხვევაში უნდა ჩატარდეს ტრენინგები კონკრეტულ ქიმიურ ტვირთთან მუშაობის დეტალურად შესასწავლად.
მაგალითად: „TDI – Toluene Di-iso Cianate“, ეს ქიმიური ნივთიერება ერთდროულად არის როგორც ძალიან ტოქსიკური, ასევე მალფეთქებადი და ამასთან ერთად ძალიან მგრძნობიარე ტენიანობასთან. ელემენტარულად, ერთ წვეთ წყალს შეუძლია აფეთქების გამოწვევა და ამავდრულად დიდი რაოდენობით ექსტრემალურად მომწამვლელი აირის გამოყოფა, რომლის ერთი შესუნთქვაც კი შეიძლება საკმარისი აღმოჩნდეს ფატალური შედეგის დასადგომად. ასეთი ტიპის ტვირთების გადაზიდვას წინ უძღვის დიდი სამუშაო: გემის დასატვირთად მომზადება, ეკიპაჟის ტრეინინგი, MSDS-ის დეტალურად შესწავლა, პირველადი დახმარების აღმოჩენის შესწავლა/ტრეინინგი, სწორი სამედიცინო პრეპარატების გამოყენების დემონსტრირება/ტრეინინგი, დამატებითი ქიმიური ნივთიერებების (ნეტრალიზატორების) სწორად მომარაგება/განლაგება ბორტზე, სატვირთო ოპერაციების სწორად დაგეგმვა (ისევ და ისევ ეკიპაჟის ყველა წევრის გაცნობა დაგეგმილი ოპერაციების ყველა ეტაპთან). ტვირთის გადმოტვირთვის შემდეგ სატვირთო აუზების (ტანკების) სწორად გარეცხვა ყველა რისკ ფაქტორის გათვალისწინებით, ნარეცხი ქიმიური ნივთიერებისა და შემდეგ ნარეცხი წყლის სწორად ჩაბარება/გადაღვრა და ასე შემდეგ.
რა თქმა უნდა, რისკები ბევრია და ყოველი სატვითო რეცხვის ოპერაციის დაწყებამდე, თითოეული მათგანი დაწვრილებით უნდა იქნეს შესწავლილი, გაანალიზებული და გათვალისწინებული, ყოველ ჯერზე თავიდან! გამონაკლისის გარეშე.
შემთხვევა: საკუთარი პრაქტიკიდან შემიძლია გავიხსენო TDI-ს რეცხვის პროცესში, მილში წნევის ცვალებადობის ზეგავლენისგან ტანკების სარეცხი მილის შეერთების ადგილიდან გამოჟონილი სულ რამდენიმე გრამი ნივთიერების მიერ გამოწვეული მომწამვლელი აირის ღრუბელი გემბანზე. საბედნიეროდ, კარგად გაწვრთნილმა ეკიპაჟმა კარგად გაართვა თავი ავარიულ სიტუაციას, მაგრამ მიზანი ყოველთვის არის 0 ინციდენტი, ამის მიღწევას კი სჭირდება, რა თქმა უნდა რეგულარული ტრეინინგი, შეხვედრები სიახლეების გასაზიარებლად, გემის ყველა მოწყობილობის სწორი მართვა და მოვლა (რასაც ცალკეული ტრეინინგი და ცოდნის გაახლება „Refresh“ სჭირდება).
რჩევები: ჩემი მოკრძალებული რჩევაა ყველა ახალგაზრდა მეზღვაურისთვის, რომ არ დაიზარონ და მაქსიმალურად გაეცნონ იმ გარემოს სადაც მოუწევთ მუშაობა, არა მხოლოდ კოლეგების გადმოცემით, არამედ ტექნიკური ლიტერატურის გაცნობით, რათა სრულიად დარწმუნებულად და თავდაჯერებულად მოკიდონ ხელი კონკრეტული სამუშაოს შესრულებას და უსაფრთხოდ მიიყვანონ ბოლომდე. რეგულარულად ჩაატარონ შეხვედრები და განიხილონ არა მარტო ტვირთის, არამედ გემზე არსებული უსაფრთხოების ინვენტარი და პროცედურები. ჩაატარონ ტრეინინგები არსებული ინვენტარის სწორად გამოყენებისა თუ მოვლის საფუძვლიანად შესასწავლად.
დაუსვით კითხვა საკუთარ თავს – რას გააუმჯობესებდით არსებულ პროცედურებში? სად ხედავთ სუსტ რგოლს, როგორ გავაძლიეროთ სუსტი რგოლები და ა.შ. ეს ინფორმაცია უმნიშვნელოვანესია უსაფრთხოების მენეჯმენტისათვის, მიაწოდეთ ის მენეჯმენტ კომპანიას თქვენივე იდეებთან ერთად.
მართალია შვებულებაში ყოფნისას ცოტა რთულია სამსახურზე იფიქრო, მაგრამ დღეს არის ყველა საშუალება იმისათვის, რომ მიიღოთ ინფორმაცია სიახლეების შესახებ საზღვაო სფეროში, გაეცანით ამ სიახლეებს ინტერნეტ სივრცეში, ეს დაგეხმარებათ ცოდნისა და გამოცდილების გასაღრმავებლად. გაუზიარეთ თქვენი გამოცდილება სხვებს ამ ვებ-გვერდის მეშვეობით, გაეცანით თქვენი კოლეგების გამოცდილებას.
გამოიყენეთ უკვე მომხდარი ინციდენტების ანალიზი, ნუ დაელოდებით საკუთარ ცუდ გამოცდილებას, განიხილეთ, ჩამოაყალიბეთ თქვენი აზრი მათ შესახებ და გაუზიარეთ სხვებს. ამაში კი ძალიან დაგეხმარებათ ეს ვებ-გვერდი.
გისუვებთ ზურგის ქარს და მშვიდობიან ზღვაოსნობას!
